بنگلورو، 30/ جولائی (ایس او نیوز /ایجنسی) وزیر اعلیٰ ڈی کے شیوکمار نے اعلان کیا ہے کہ کاویری دریا کے پانی کے تنازع پر آئندہ اتوار، 2 اگست کو وزیراعلیٰ کی سرکاری رہائش گاہ کرشنا میں کل جماعتی اجلاس طلب کیا گیا ہے، جس میں ریاست کے سابق وزرائے اعلیٰ، کاویری طاس سے تعلق رکھنے والے ارکانِ پارلیمان اور اراکینِ اسمبلی کو مدعو کیا گیا ہے۔

دہلی میں کرناٹک بھون میں ذرائع ابلاغ سے گفتگو کرتے ہوئے انہوں نے کہا کہ ریاستی حکومت نے آج کاویری واٹر مینجمنٹ اتھارٹی کے سامنے اپیل دائر کر دی ہے۔ اب اس معاملے میں آئندہ کی حکمتِ عملی کل جماعتی اجلاس میں طے کی جائے گی تاکہ ریاست کے مفاد کے تحفظ کے لیے مشترکہ موقف اختیار کیا جا سکے۔

انہوں نے بتایا کہ اس سلسلے میں مرکزی وزراء پرہلاد جوشی، وی۔ سومنّا، جگدیش شیٹر اور سابق وزیراعلیٰ بسواراج بومئی سمیت دیگر ارکانِ پارلیمان سے بھی تبادلۂ خیال کیا گیا ہے اور سبھی ریاست کے مفاد کے لیے اپنی بھرپور کوششیں کر رہے ہیں۔

تمل ناڈو کے وزیراعلیٰ وجئے کے بارے میں ایک سوال کے جواب میں، جس میں ڈی ایم کے رہنما انبومنی کی جانب سے انہیں دہلی حکومت سے رجوع کرنے کا مشورہ دینے کا حوالہ دیا گیا، شیوکمار نے کہا کہ وہ اس معاملے پر کوئی تبصرہ نہیں کرنا چاہتے۔ انہوں نے کہا کہ دونوں ریاستوں کو ایک دوسرے کا احترام کرنا چاہیے، قانون کے مطابق آگے بڑھنا چاہیے اور پورے ملک کو باہمی تعاون کے ساتھ کام کرنا چاہیے۔

کابینہ میں توسیع سے متعلق بھارتیہ جنتا پارٹی کی تنقید پر ردعمل ظاہر کرتے ہوئے ڈی۔ کے۔ شیوکمار نے کہا کہ سابق وزیراعلیٰ بی۔ ایس۔ یدیورپا نے بھی ایک عرصے تک مکمل کابینہ تشکیل دیے بغیر حکومت چلائی تھی، اس لیے موجودہ حکومت پر اس حوالے سے تنقید بے بنیاد ہے۔