اسلام آباد ، 21/ دسمبر (ایس او نیوز /ایجنسی)پاکستان کے سابق وزیرِ اعظم عمران خان اور ان کی اہلیہ بشریٰ بی بی کو ایک عدالت نے 17 سال قید کی سزا سنائی ہے۔ توشہ خانہ-2 کیس میں پی ٹی آئی کے بانی عمران خان اور ان کی اہلیہ کو یہ سزا فیڈرل انویسٹی گیشن ایجنسی کی خصوصی عدالت نے سنائی ہے۔ یہ معاملہ مئی 2021 میں سعودی عرب کے دورے کے دوران عمران خان کو بطور تحفہ ملنے والے قیمتی بلغاری زیورات کے سیٹ کو انتہائی کم قیمت پر خریدنے سے متعلق ہے۔

یہ فیصلہ راولپنڈی کی اڈیالہ جیل میں ہونے والی سماعت کے دوران خصوصی جج سینٹرل شاہ رخ ارجمند نے سنایا، جہاں عمران خان اس وقت قید ہیں۔ عمران خان کو مجموعی طور پر 17 سال قید کی سزا سنائی گئی ہے۔ انہیں بدعنوانی کی روک تھام کے قانون کی دفعہ 409 (مجرمانہ خیانت) کے تحت 10 سال سخت قید کی سزا دی گئی ہے، جبکہ سرکاری اہلکاروں کے مجرمانہ بدعنوان طرزِ عمل کے الزام میں مزید 7 سال قید کی سزا سنائی گئی ہے۔

بشریٰ بی بی کو بھی انہی دونوں الزامات کے تحت 17 سال قید کی سزا دی گئی ہے۔ اس کے علاوہ عمران خان اور بشریٰ بی بی دونوں پر 1 کروڑ 64 لاکھ روپے جرمانہ بھی عائد کیا گیا ہے۔ جرمانہ ادا نہ کرنے کی صورت میں انہیں مزید سزا بھگتنا ہوگی۔