بنگلورو، 21 جولائی (ایس او نیوز / ایجنسی)ریاست کرناٹک میں وی آئی پی قافلوں کے دوران سائرن کے غیر ضروری اور بےجا استعمال پر اب مکمل پابندی عائد کر دی گئی ہے۔ اس سلسلے میں ریاستی پولیس کے ڈائریکٹر جنرل اور انسپکٹر جنرل ڈاکٹر ایم اے سلیم نے تمام پولیس افسران کو سخت ہدایات جاری کی ہیں، جن میں سائرن کے اصول و ضوابط پر سختی سے عمل کرنے پر زور دیا گیا ہے۔

محکمہ پولیس کی جانب سے جاری کردہ سرکیولر میں کہا گیا ہے کہ وی آئی پی نقل و حرکت کے دوران سائرن کے غیر ضروری استعمال سے عوام میں بے چینی پھیلتی ہے، ٹریفک کی روانی متاثر ہوتی ہے، اور بعض اوقات سیکیورٹی خطرات بھی پیدا ہو سکتے ہیں۔ سائرن کی آواز سے وی آئی پی شخصیت کے گزرنے کا راستہ عوام پر ظاہر ہو جاتا ہے، جو ان کی جان و مال کے لیے خطرہ بن سکتا ہے۔

حکم نامے میں یہ بھی نشاندہی کی گئی ہے کہ اچانک اور غیر ضروری سائرن بجنے سے سڑکوں پر موجود ڈرائیور الجھن میں پڑ جاتے ہیں، بعض اوقات گاڑیاں غلط سمت میں چلی جاتی ہیں، جس سے حادثات اور قافلے کی سیکیورٹی میں خلل واقع ہو سکتا ہے۔

ڈاکٹر ایم اے سلیم نے ہدایت دی ہے کہ وی آئی پی قافلوں کے دوران ایک مقام سے دوسرے مقام تک ضروری اطلاعات کی ترسیل کے لیے سائرن کے بجائے وائرلیس کمیونیکیشن جیسے محفوظ اور جدید ذرائع کا استعمال کیا جائے۔ انہوں نے واضح کیا کہ سائرن صرف ہنگامی خدمات کے لیے مخصوص ہیں، جیسے ایمبولینس، فائر بریگیڈ اور پولیس گاڑیاں، اور ان کا استعمال صرف ناگزیر حالات میں ہی کیا جانا چاہیے۔

یہ ہدایات ریاست کے تمام پولیس یونٹ انچارج افسران کو ارسال کی گئی ہیں تاکہ وہ اپنے ماتحت عملے کو اس فیصلے پر سختی سے عمل کروائیں۔ پولیس کے اس اقدام کو عوامی سکون، سیکیورٹی اور شور کی آلودگی پر قابو پانے کے لیے ایک مثبت قدم قرار دیا جا رہا ہے۔