بنگلورو، 5 جون (ایس او نیوز) : رائل چیلنجرز بنگلورو (آر سی بی) نے اپنی آئی پی ایل جیت کی تقریب کے دوران پیش آئے افسوسناک حادثے پر گہرے دکھ کا اظہار کرتے ہوئے جاں بحق ہونے والے افراد کے لواحقین کو مالی امداد فراہم کرنے کا اعلان کیا ہے۔ ٹیم کی جانب سے جاری بیان کے مطابق، حادثے میں جاں بحق ہونے والے ہر فرد کے اہل خانہ کو فی کس 10 لاکھ روپے دیے جائیں گے، جبکہ زخمیوں کی مدد کے لیے "آر سی بی کیئرز" نامی خصوصی فنڈ بھی قائم کیا گیا ہے۔
یہ اندوہناک واقعہ بدھ کی شام چنّاسوامی اسٹیڈیم کے باہر پیش آیا، جب رائل چیلنجرز بنگلورو کی فتح کی خوشی میں منعقدہ پریڈ کے دوران اسٹیڈیم کے اطراف ہزاروں افراد کا ہجوم جمع ہو گیا۔ انتظامی غفلت اور ہجوم پر قابو پانے کے ناکافی انتظامات کے باعث بھگدڑ مچ گئی، جس میں 11 افراد جاں بحق اور 33 زخمی ہو گئے۔
ریاست کے وزیر اعلیٰ سدارامیا نے بھی اس واقعے پر گہرے رنج و غم کا اظہار کرتے ہوئے جاں بحق افراد کے اہل خانہ کو فی کس 10 لاکھ روپے معاوضہ اور زخمیوں کو مفت علاج فراہم کرنے کا اعلان کیا ہے۔ ساتھ ہی، وزیر اعلیٰ نے واقعے کی تفصیلی تحقیقات کے لیے مجسٹریٹ سطح کی انکوائری کا حکم بھی دیا ہے، جس کے تحت بنگلور اربن ضلع کے ڈپٹی کمشنر جی جگدیش کو انکوائری افسر مقرر کیا گیا ہے۔
آر سی بی انتظامیہ نے اپنے بیان میں کہا ہے کہ وہ اس سانحہ پر دل گرفتہ ہیں اور متاثرہ خاندانوں کے ساتھ مکمل یکجہتی کا اظہار کرتے ہیں۔ ٹیم کا کہنا ہے کہ "آر سی بی کیئرز" فنڈ کے ذریعے زخمی شائقین کو بھی ہر ممکن مدد فراہم کی جائے گی۔
یہ حادثہ عوامی تقاریب میں ہجوم کے انتظامات اور حفاظتی اقدامات کی سنگینی کو واضح کرتا ہے۔ توقع کی جا رہی ہے کہ ریاستی حکومت اور متعلقہ ادارے آئندہ ایسے واقعات کی روک تھام کے لیے جامع اور مؤثر حکمت عملی اپنائیں گے۔