بنگلورو27/ مارچ (ایس او نیوز) محکمہ موسمیات کی پیش گوئی کے مطابق کرناٹک میں 27 مارچ سے 2 اپریل تک پری مانسون سرگرمیاں تیز ہونے والی ہیں اور اگلے سات دنوں میں بڑے پیمانے پر بارش کا امکان ہے ۔
محکمہ نے بشمول دکشن کنڑا اور اڈپی تقریباً 14-15 اضلاع کے لیے ایلو الرٹ جاری کیا ہے۔
بتایا گیا ہے کہ ریاست کے کئی حصوں میں بادلوں کی گرج ، بجلیوں کی چمک اور تیز ہواؤں کے ساتھ بارش کے امکانات ہیں ۔27 مارچ سے اگلے چار دنوں تک ساحلی علاقوں اور شمالی کرناٹک کے کچھ اندرونی اضلاع میں ہلکی سے درمیانی درجے کی بارش متوقع ہے ۔
اترا کنڑا، دکشن کنڑا، اڈپی، وجئے پورہ، باگل کوٹ، رائچور، کوپل، بلاری، چترادرگا، میسور، کوڈاگو، ہاسن، چکبالا پور، بنگلورو اربن اور کولار جیسے اضلاع کے لیے یلو الرٹ کا اعلان کیا گیا ہے۔ ان علاقوں میں گرج چمک کے ساتھ بارش ہو سکتی ہے اور 30-50 کلومیٹر فی گھنٹہ کی رفتار سے ہوائیں چل سکتی ہیں ۔
28 مارچ کو شمالی کرناٹک کے اضلاع میں بارش کی سرگرمی جاری رہنے کی توقع ہے، جبکہ جنوبی اندرونی علاقوں بشمول بنگلورو میں 29 مارچ سے بارش میں اضافہ ہو سکتا ہے ۔
جنوبی کنڑا، اڈپی، اور اترا کنڑ اضلاع میں الگ الگ مقامات پر دوپہر اور شام کے اوقات میں گرج چمک کے ساتھ بارش کا امکان جتایا گیا ہے۔
اگرچہ اگلے ایک یا دو دنوں میں بارش میں قدرے کمی ہو سکتی ہے، لیکن ایسے اشارے ہیں کہ یہ 4 یا 5 اپریل تک جاری رہ سکتی ہے ۔
بنگلورو میں آنے والے دنوں میں اچھی بارش متوقع ہے، خاص طور پر شام اور رات کے دوران درجہ حرارت زیادہ سے زیادہ 33 ° C اور کم از کم 20 ° C کے آس پاس رہنے کا امکان ہے ۔
کوڈاگو، ہاسن، چکمگلورو، اور شیموگا جیسے اضلاع میں بھی دوپہر اور شام کے دوران گرج چمک کے ساتھ بارش کا امکان ہے اور کچھ علاقوں میں معمول کی بارش متوقع ہے ۔ اسی طرح کے موسمی حالات میسورو اور ٹمکورو اور چترادرگا اضلاع کے کچھ حصوں کے لئے پیش گوئی کی گئی ہے ۔
حکام نے عوام کو مشورہ دیا ہے کہ بارش اور بجلی گرنے کے دوران محفوظ مقامات پر پناہ لیں اور تازہ ترین معلومات کے لیے کرناٹک اسٹیٹ نیچرل ڈیزاسٹر مانیٹرنگ سینٹر (KSNDMC) یا IMD ویب سائٹ سے اپ ڈیٹس پر عمل کریں ۔
موسم کا موجودہ نمونہ شمالی کرناٹک اور وسطی ہندوستان میں درمیانی سطح پر اینٹی سائیکلون گردش سے منسوب ہے، جس سے بالخصوص شمالی کرناٹک میں بارش کی سرگرمیوں میں اضافہ ہونے کا امکان ہے ۔ 28 مارچ کے بعد جنوبی اندرونی اضلاع تک بھی بارش کا امکان ہے۔