بنٹوال ، 12/ نومبر (ایس او نیوز)  وٹل کسبا گاؤں کے ’اڈا بیدی'  علاقے میں واقع ’باکیمارو گدے' میں پٹاخوں کی ایک دکان کے پیچھے کھڑی موٹر سائیکل کو مبینہ طور پر شرپسند عناصر نے آگ لگا دی ۔ اس واقعے میں موٹر سائیکل مکمل طور پر جل کر خاکستر ہو گئی ۔

بتایا جاتا ہے کہ یہ موٹر سائیکل کیپو  گاؤں کے علاقے ’پادی باگیلو‘کے رہائشی منوہر نامی شخص کی تھی ۔ 10  نومبر کی رات کو اپنا کام ختم کرنے کے بعد  منوہر نے گھر روانہ ہونے سے پہلے اپنی موٹر سائیکل پٹاخوں کی دکان کے پیچھے کھڑی کر دی تھی ۔ رات تقریباً 11 بجے دکان بند کرنے کے بعد وہ باقی بچے ہوئے پٹاخے اپنے ساتھ لے کر گھر چلا گیا ۔ جب وہ 11 نومبر کی صبح دوبارہ اس جگہ پہنچا تو دیکھا کہ موٹر سائیکل مکمل طور پر جل کر راکھ  ہو چکی تھی ۔

منوہر کو شبہ ہے کہ نامعلوم شرپسند عناصر نے جان بوجھ کر موٹر سائیکل کو آگ لگائی ہے ۔ منوہر نے اس تعلق سے وٹل پولیس اسٹیشن میں شکایت درج کرائی ہے ۔