بنگلورو، 5 /اگست (ایس او نیوز / ایجنسی) کرناٹک ہائی کورٹ کی جانب سے ریاست میں 5 اگست سے شروع ہونے والی مجوزہ ہڑتال پر عبوری روک لگانے کے بعد، کرناٹک اسٹیٹ روڈ ٹرانسپورٹ کارپوریشن (کے ایس آر ٹی سی) کے منیجنگ ڈائریکٹر اکرم پاشاہ نے ملازمین سے اپیل کی ہے کہ وہ عدالتِ عالیہ کے حکم کا احترام کریں اور ہڑتال سے گریز کریں۔

اکرم پاشاہ نے اپنے بیان میں کہا کہ چونکہ عدالت نے ہڑتال پر پابندی عائد کر دی ہے اور ریاستی وزیر اعلیٰ نے بھی مزدور تنظیموں کے مطالبات پر مثبت ردعمل دیا ہے، اس لیے تمام ملازمین سے توقع کی جاتی ہے کہ وہ اپنی معمول کی ڈیوٹی انجام دیں گے تاکہ عوام کو کسی قسم کی تکلیف کا سامنا نہ کرنا پڑے۔

منیجنگ ڈائریکٹر نے مزید کہا کہ کے ایس آر ٹی سی ایک عوامی خدمات فراہم کرنے والا ادارہ ہے جس پر لاکھوں مسافروں کا روزمرہ کا سفر منحصر ہے۔ اس لیے ادارے سے وابستہ تمام ملازمین کو چاہیے کہ وہ عوامی مفاد کو مدنظر رکھتے ہوئے عدالتی حکم کی پاسداری کریں اور ہڑتال میں حصہ نہ لیں۔

واضح رہے کہ ریاست کی مختلف ٹرانسپورٹ یونینز نے اپنی مانگوں کی تکمیل کے لیے 5 اگست سے غیر معینہ مدت کی ہڑتال کا اعلان کیا تھا، جس پر ہائی کورٹ نے عبوری حکم جاری کرتے ہوئے روک لگا دی ہے۔