بھٹکل، 21 جون (ایس او نیوز): جنوبی مغربی مانسون کی سرگرمیوں میں تیزی کے درمیان بھٹکل سمیت ساحلی کرناٹک میں بارش کا نیا سلسلہ شروع ہوگیا ہے جبکہ پڑوسی ریاستوں کیرالہ اور تمل ناڈو میں موسلادھار بارش کا الرٹ جاری کیا گیا ہے۔

محکمہ موسمیات (IMD) نے تازہ اپڈیٹس میں جنوبی ہندوستان کے مختلف علاقوں میں بھاری بارش کی بھی پیش گوئی کی ہے۔ تازہ موسمی بلیٹن کے مطابق اُتر کنڑا، اُڈپی اور دکشن کنڑا اضلاع میں آئندہ 24 سے 48 گھنٹوں کے دوران متعدد مقامات پر تیز بارش متوقع ہے جبکہ ساحلی علاقوں میں سمندری حالات بھی نسبتاً خراب رہ سکتے ہیں۔

اُتر کنڑا ضلع کے بھٹکل سمیت کاروار، انکولہ، کمٹہ، ہونّاور اور اطراف کے علاقوں میں وقفے وقفے سے بارش کا سلسلہ جاری رہنے کا امکان ظاہر کیا گیا ہے۔ محکمہ موسمیات نے ساحلی علاقوں میں گرج چمک اور تیز ہواؤں کی بھی پیش گوئی کی ہے اور ماہی گیروں کو تازہ موسمی اطلاعات پر نظر رکھنے کا مشورہ دیا ہے۔

محکمہ موسمیات کے مطابق ساحلی کرناٹک اس وقت مانسون کی سرگرمیوں کا اہم مرکز بنا ہوا ہے۔ اُڈپی اور دکشن کنڑ اضلاع میں بھی مختلف مقامات پر بھاری بارش کا امکان ظاہر کیا گیا ہے۔ مسلسل بارش کے باعث بعض نشیبی علاقوں میں پانی جمع ہونے اور چھوٹے ندی نالوں کی سطح بلند ہونے کا خدشہ ہے۔

ریاست کے شمالی اور جنوبی اندرونی حصوں میں بھی بارش کی سرگرمیاں جاری رہنے کا امکان ظاہر کیا گیا ہے۔ ریاستی دارالحکومت بنگلورو میں آئندہ دنوں کے دوران گرج چمک کے ساتھ ہلکی تا درمیانی بارش متوقع ہے۔ موسمی ماہرین کے مطابق بارش کے باعث درجہ حرارت میں کمی اور موسم نسبتاً خوشگوار رہ سکتا ہے۔

کیرالہ میں شدید بارش کا الرٹ برقرار: پڑوسی ریاست کیرالہ میں مانسون پوری شدت کے ساتھ سرگرم ہے۔ ریاست کے متعدد اضلاع میں بھاری تا بہت بھاری بارش کی پیش گوئی کی گئی ہے۔ خاص طور پر وایناڈ، اڈوکی، کوزی کوڈ، کنور اور کاسرگوڈ اضلاع میں انتظامیہ کو چوکس رہنے کی ہدایت دی گئی ہے۔

پہاڑی علاقوں میں لینڈ سلائیڈنگ، دریاؤں کی سطح میں اضافے اور نشیبی علاقوں میں پانی جمع ہونے کے خدشات کے پیش نظر مقامی انتظامیہ صورتحال پر مسلسل نظر رکھے ہوئے ہے۔

تمل ناڈو کے مغربی اضلاع میں بارش کی پیش گوئی: تمل ناڈو کے مغربی گھاٹ سے متصل اضلاع، جن میں نیلگیریس، کوئمبتور، تھینی، دنڈیگل اور کنیا کماری شامل ہیں، میں بھاری بارش متوقع ہے۔ چنئی اور اطراف کے علاقوں میں ہلکی تا درمیانی بارش اور گرج چمک کی پیش گوئی کی گئی ہے۔

شمالی بنگال میں بارش سے معمولات متاثر: مغربی بنگال میں حالیہ دنوں کے دوران سب سے زیادہ اثرات شمالی اضلاع میں دیکھے گئے ہیں۔ میڈیا رپورٹس کے مطابق دارجلنگ اور اس کے اطراف کے پہاڑی علاقوں میں شدید بارش کے باعث لینڈ سلائیڈنگ اور آمد و رفت میں رکاوٹوں کی اطلاعات موصول ہوئی ہیں۔

محکمہ موسمیات نے دارجلنگ، کالِمپونگ، جَلپائی گوڑی، علی پوردوار اور کوچ بہار سمیت شمالی بنگال کے متعدد اضلاع میں مزید بارش کی پیش گوئی کی ہے۔ دوسری جانب کولکاتا اور جنوبی بنگال میں بارش کا سلسلہ جاری رہنے کے باوجود صورتحال شمالی اضلاع کے مقابلے میں نسبتاً بہتر بتائی جا رہی ہے۔

شمال مشرقی ہندوستان میں سیلابی خدشات: آسام، میگھالیہ، اروناچل پردیش، ناگالینڈ، منی پور، میزورم اور تریپورہ میں بھاری تا انتہائی بھاری بارش کی پیش گوئی کی گئی ہے۔ کئی علاقوں میں پہلے سے جاری بارشوں کے باعث سیلاب اور لینڈ سلائیڈنگ کے خطرات برقرار ہیں۔

ملک کے دیگر حصوں میں موسم: تیلنگانہ، آندھرا پردیش، کونکن، گوا، سکم اور سب ہمالیائی مغربی بنگال کے مختلف علاقوں میں بھی بارش کی سرگرمیاں جاری رہنے کی توقع ہے۔ محکمہ موسمیات کے مطابق بحر عرب اور خلیج بنگال میں فعال موسمی نظام مانسون کو مزید تقویت فراہم کر رہے ہیں، جس کے نتیجے میں آنے والے دنوں میں جنوبی اور مشرقی ہندوستان کے مختلف علاقوں میں بارش کا سلسلہ برقرار رہ سکتا ہے۔

محکمہ موسمیات نے عوام سے اپیل کی ہے کہ وہ مقامی موسمی بلیٹنوں اور انتظامیہ کی ہدایات پر عمل کریں، خصوصاً ساحلی اور پہاڑی علاقوں میں غیر ضروری سفر سے گریز کیا جائے۔