بیلاری ،9/نومبر (ایس او نیوز /ایجنسی) وزیر برائے صحت، اقلیتی بہبود، اوقاف و حج یو ٹی قادر نے کہا ہے کہ ریاست کے ہر شہری کو معیاری، بروقت اور قابل رسائی طبی سہولتیں فراہم کرنا حکومت کا عہد ہے۔ اسی مقصد کے تحت محکمہ صحت میں کئی اہم اصلاحات متعارف کرائی جارہی ہیں، تاکہ سماج کے آخری درجے تک پہنچنے والے ہر فرد کو بہتر علاج اور مفت طبی خدمات فراہم کی جاسکیں۔
وزیر یو ٹی قادر نے اپنے دورۂ بیلاری کے دوران منعقدہ پریس کانفرنس میں محکمہ صحت کی جانب سے جاری اصلاحات، نئی تقرریوں، ایمبولینس خدمات کی توسیع اور اسپتالوں کی سہولتوں میں اضافے سے متعلق تفصیلات میڈیا کے نمائندوں کے ساتھ شیئر کیں۔
انہوں نے بتایا کہ ریاست میں ڈاکٹروں کی براہِ راست تقرری کی اجازت ملنے کے بعد 200 سے زائد ڈاکٹروں نے مختلف پرائمری ہیلتھ سینٹرس میں اپنی خدمات انجام دینا شروع کردی ہیں۔ اس کے علاوہ ہر ضلع کی ضرورت کے مطابق لیب ٹیکنیشن اور فارماسسٹ کی خدمات آؤٹ سورسنگ کے ذریعے حاصل کی گئی ہیں، تاکہ سرکاری طبی مراکز میں عملے کی کمی دور کی جاسکے اور مریضوں کو بروقت خدمات فراہم ہوں۔
ایمبولینس خدمات میں بہتری کے حوالے سے وزیر صحت نے کہا کہ دیہی علاقوں سے مریضوں کو پرائمری ہیلتھ سینٹر اور وہاں سے تعلقہ اسپتال تک 20 سے 25 منٹ کے اندر پہنچانے کا نظام دسمبر کے اختتام تک مکمل طور پر نافذ کردیا جائے گا۔
انہوں نے بتایا کہ وزیر اعلیٰ اور محکمہ مالیات نے 350 نئی ایمبولینسوں کی خریداری کو منظوری دے دی ہے۔ موجودہ 450 ایمبولینسوں کے ساتھ نئی گاڑیوں کی شمولیت کے بعد ریاست میں مجموعی طور پر 800 ایمبولینسوں کا مضبوط نیٹ ورک قائم ہوگا۔
یو ٹی قادر نے مزید کہا کہ ایمبولینس کی خدمات میں تاخیر کی صورت میں متعلقہ انتظامی ایجنسی پر 3 ہزار روپے جرمانہ عائد کرنے کی سخت شرط رکھی گئی ہے۔ ایمبولینسوں کی صفائی، ڈرائیوروں کی دستیابی اور گاڑیوں کی مناسب دیکھ بھال کی مکمل ذمہ داری بھی متعلقہ ایجنسی کی ہوگی۔
وزیر صحت نے بتایا کہ تعلقہ سطح کے سرکاری اسپتالوں کو مزید مستحکم بنانے کے لیے 100 روزہ پروگرام شروع کیا جارہا ہے۔ اس کے تحت ہر تعلقہ اسپتال میں ماہر ڈاکٹروں کی تقرری کے ساتھ 5 آئی سی یو بستر قائم کیے جائیں گے۔
انہوں نے کہا کہ عام ہنگامی طبی معاملات میں بھی مریضوں کو ضلع اسپتال منتقل کرنے کی ضرورت نہیں پڑنی چاہیے بلکہ انہیں تعلقہ سطح پر ہی مناسب علاج کی سہولت دستیاب ہونی چاہیے۔ اس اقدام سے عوام کو اپنے علاقوں میں بہتر طبی خدمات حاصل ہوں گی اور ضلع اسپتالوں پر مریضوں کا دباؤ بھی کم ہوگا۔
یو ٹی قادر نے کہا کہ کرناٹک حکومت خواتین کی صحت کے لیے ایک خصوصی ویمن ہیلتھ پالیسی متعارف کرارہی ہے، جو ملک میں اپنی نوعیت کی منفرد پہل ہوگی۔ اس پالیسی کے تحت پیدائش سے لے کر بڑھاپے تک خواتین کی صحت سے متعلق بیماریوں کی روک تھام، تشخیص اور علاج کے لیے ایک علیحدہ شعبہ قائم کیا جائے گا۔ اس کے علاوہ اس شعبے کی نگرانی اور مؤثر عمل آوری کے لیے علیحدہ ڈپٹی ڈائریکٹر (ڈی ڈی) بھی مقرر کیا جائے گا۔
انہوں نے کہا کہ خواتین کی صحت کے تمام مراحل کو مدنظر رکھتے ہوئے خصوصی طبی خدمات فراہم کرنا اس پالیسی کا بنیادی مقصد ہے۔
وزیر صحت نے واضح کیا کہ حکومت کا اصل مقصد سرکاری صحت کے نظام میں نمایاں بہتری لاتے ہوئے طبی سہولتوں کو عام آدمی تک پہنچانا ہے، تاکہ معاشی حیثیت یا رہائشی علاقے سے قطع نظر سماج کے ہر طبقے کو معیاری اور مفت علاج کی سہولت میسر آسکے۔