منگلورو 29/جولائی (ایس او نیوز): نوجوانوں میں منشیات کے بڑھتے رجحان پر قابو پانے کی مسلسل کوششوں کے تحت منگلورو سٹی پولیس نے کالج طلبہ کے لیے اچانک ڈرگ ٹیسٹنگ مہم چلائی۔ یہ کارروائی کوٹیکار بیری اور کوناجے کے قریب بنٹس بھون کے اطراف کی گئی، جہاں مختلف کالجوں کے طلبہ کو نشانہ بنا کر منشیات کے استعمال کی جانچ کی گئی۔

ذرائع سے ملی اطلاع کے مطابق یہ مہم ڈپٹی کمشنر آف پولیس (لاء اینڈ آرڈر) کی نگرانی میں ساؤتھ اور سینٹرل سب ڈویژن کے اسسٹنٹ کمشنرز آف پولیس (ACP) کی قیادت میں انجام دی گئی۔ شام تقریباً 4:30 بجے سے 6:00 بجے تک جاری رہنے والی کارروائی کے دوران ان راستوں پر چلنے والی نجی اور کالج بسوں کو روک کر طلبہ کی ملٹی ڈرگ ٹیسٹنگ کٹس کے ذریعے جانچ کی گئی۔

اُلّال پولیس اسٹیشن کی حدود میں واقع کوٹیکار بیری کے مقام پر ایس ڈی ایم کالج، نِٹے کے ایس ہیگڑے، سینٹ الویشیئس کالج، پی اے کالج، بیریز انسٹی ٹیوٹ، ٹیپو سلطان کالج اور کینرا کالج سمیت مختلف تعلیمی اداروں کے 72 طلبہ کے ڈرگ ٹیسٹ کیے گئے۔ ان میں 71 طلبہ کے نتائج منفی آئے، جبکہ ایک طالب علم کے ٹیسٹ میں منشیات کے استعمال کی تصدیق ہوئی۔

اسی طرح کوناجے پولیس اسٹیشن کی حدود میں بنٹس بھون کے قریب پی اے کالج کی دو بسوں کو روک کر 87 طلبہ کے ڈرگ ٹیسٹ کیے گئے۔ اس کارروائی میں شامل تمام طلبہ کے نتائج منفی آئے اور کسی بھی طالب علم میں منشیات کے استعمال کے شواہد نہیں ملے۔

پولیس حکام نے کہا کہ صرف ایک طالب علم کا مثبت پایا جانا اس بات کا حوصلہ افزا اشارہ ہے کہ طلبہ میں منشیات کے استعمال کا رجحان پہلے کے مقابلے میں کم ہو رہا ہے۔ تاہم انہوں نے اس بات پر زور دیا کہ منشیات کے ناسور کو جڑ سے ختم کرنے کے لیے ابھی مزید مربوط اور مسلسل اقدامات کی ضرورت ہے۔

پولیس کے مطابق جس طالب علم کا ڈرگ ٹیسٹ مثبت آیا ہے، قانونی کارروائی کی ضروری رسمی کارروائیاں مکمل ہونے کے بعد اسے کونسلنگ کے لیے بھیجا جائے گا، جبکہ معاملے میں مزید قانونی اور انتظامی کارروائی بھی عمل میں لائی جائے گی۔