میسورو، 30 مارچ (ایس او نیوز /ایجنسی) وزیر اعلیٰ سدارامیا نے کہا ہے کہ ریاستی حکومت تعلیم، قانون و انصاف اور صحت کے شعبوں کو خصوصی اہمیت دے رہی ہے۔ وہ میسورو کے وشویشور نگر میں نئے قائم کردہ جے سی اسپورٹس میڈیسن سنٹر اور ملٹی اسپیشلٹی اسپتال کے افتتاح کے موقع پر خطاب کر رہے تھے۔

وزیر اعلیٰ نے کہا کہ اس ادارے کے بانی ڈاکٹر گیریش چندر ایک ماہر معالج ہیں اور ان کے والد بھی میسورو تعلقہ کے اولین ڈاکٹروں میں شمار ہوتے تھے۔ انہوں نے کہا کہ معاشرے میں تعلیم اور صحت دونوں بنیادی ستون ہیں اور انسان کے لیے صحت مند زندگی سب سے زیادہ اہم ہے۔

انہوں نے ڈاکٹروں کو مشورہ دیا کہ وہ غریب عوام کی خدمت کو اپنا مقصد بنائیں اور جہاں ممکن ہو مفت یا کم خرچ میں علاج فراہم کریں تاکہ معاشرے کے کمزور طبقات کو سہارا مل سکے۔

سدارامیا نے کہا کہ وہ خود میسورو ضلع سے تعلق رکھتے ہیں اور یہاں کے عوام کے احسان مند ہیں، اسی لیے شہر کی ترقی کو خصوصی ترجیح دی جا رہی ہے۔ انہوں نے کہا کہ سماجی، معاشی اور تعلیمی مساوات کے بغیر حقیقی آزادی کا تصور ممکن نہیں، جس پر ڈاکٹر بی آر امبیڈکر نے بھی زور دیا تھا۔

انہوں نے مزید کہا کہ حکومت عوامی فلاح کے لیے کیے گئے وعدوں کو پورا کرنے کی سنجیدہ کوشش کر رہی ہے اور ایک مساوی معاشرہ قائم کرنے کے لیے غریب طبقات کو معاشی و سماجی طور پر مضبوط بنانا ضروری ہے۔ وزیر اعلیٰ نے کہا کہ انسان کو اپنی زندگی میں اچھے کام انجام دینے چاہئیں کیونکہ دولت کے باوجود اگر صحت نہ ہو تو اس کی کوئی اہمیت نہیں رہتی۔