بنگلورو، 9 اپریل (ایس او نیوز/ایجنسی) کرناٹک حکومت کے محکمہ خوراک، شہری رسد اور صارفین امور نے واضح کیا ہے کہ ریاست میں آٹو گیس کی قلت سے متعلق گردش کرنے والی خبریں محض افواہیں ہیں اور عوام کو کسی بھی قسم کی گھبراہٹ میں مبتلا ہونے کی ضرورت نہیں ہے۔

محکمہ کی جانب سے جاری بیان کے مطابق حالیہ دنوں میں بعض میڈیا رپورٹس اور غیر مصدقہ اطلاعات کی بنیاد پر آٹو رکشہ مالکان اور ڈرائیور حضرات گیس بنکوں کے باہر طویل قطاروں میں کھڑے ہو رہے ہیں، جو کہ بلاجواز ہے۔ حکومت نے اس صورتحال کا نوٹس لیتے ہوئے وضاحت کی ہے کہ گیس کی فراہمی معمول کے مطابق جاری ہے۔

حکام کے مطابق چند نجی آٹو گیس سپلائی کرنے والی کمپنیوں میں معمولی سطح کی کمی ضرور دیکھی گئی ہے، تاہم اس مسئلے کو حل کرنے کے لیے سرکاری تیل کمپنیوں جیسے انڈین آئل کارپوریشن، بھارت پٹرولیم کارپوریشن اور ہندوستان پٹرولیم کارپوریشن کے ذریعے اضافی مقدار میں گیس فراہم کی جا رہی ہے۔

بیان میں کہا گیا ہے کہ پہلے ان تینوں کمپنیوں کی جانب سے اوسطاً 56.67 میٹرک ٹن آٹو گیس سپلائی کی جاتی تھی، تاہم موجودہ طلب کو پورا کرنے کے لیے سپلائی میں نمایاں اضافہ کیا گیا ہے اور اب یومیہ اوسط 83.58 میٹرک ٹن گیس مختلف ریٹیل آؤٹ لیٹس تک پہنچائی جا رہی ہے۔

اعداد و شمار کے مطابق گزشتہ پانچ دنوں کے دوران گیس کی فراہمی مستحکم رہی ہے۔ 2 اپریل کو 87.78 میٹرک ٹن، 3 اپریل کو 86.05 میٹرک ٹن، 4 اپریل کو 84.80 میٹرک ٹن، 5 اپریل کو سب سے زیادہ 94.11 میٹرک ٹن جبکہ 6 اپریل کو 83.58 میٹرک ٹن گیس فراہم کی گئی۔

محکمہ خوراک، شہری رسد اور صارفین امور نے ریاست کے آٹو مالکان اور ڈرائیوروں سے اپیل کی ہے کہ وہ جھوٹی افواہوں پر کان نہ دھریں اور غیر ضروری طور پر گیس بنکوں کے باہر قطاریں نہ لگائیں۔ بیان میں مزید کہا گیا ہے کہ گیس کی فراہمی مکمل طور پر منظم ہے اور عوام سے تعاون کی امید کی جاتی ہے۔