بنگلورو ، 4/ اپریل (ایس او نیوز/ایجنسی)  وزیر اعلیٰ سدارامیا نے کہا ہے کہ ریاست میں قانون و نظم کی بہتر صورتحال کا براہِ راست تعلق معاشی ترقی اور جی ڈی پی کی رفتار سے ہے، اس لیے پولیس محکمہ کو اس پہلو کو پیش نظر رکھتے ہوئے اپنی ذمہ داریاں انجام دینی چاہئیں۔

وہ کورمنگلا کے پریڈ گراؤنڈ میں منعقدہ ’’پولیس فلیگ ڈے‘‘ کی تقریب سے خطاب کر رہے تھے، جہاں انہوں نے پولیس اہلکاروں کو ’’وزیر اعلیٰ میڈل‘‘ بھی عطا کیے۔

وزیر اعلیٰ نے کہا کہ سائبر جرائم سمیت بعض جرائم کی شرح ریاست میں قومی اوسط سے زیادہ ہے، جسے سختی سے کنٹرول کرنے کی ضرورت ہے۔ انہوں نے اس بات پر زور دیا کہ کسی بھی پولیس تھانے کی حدود میں ایسا کوئی جرم نہیں ہو سکتا جو متعلقہ افسر کے علم میں نہ آئے، اس لیے ذمہ داری کے ساتھ کام کرنا ضروری ہے۔

انہوں نے کہا کہ کئی اقسام کے جرائم پر قابو پانے اور سزا کی شرح بڑھانے میں کرناٹک ملک میں نمایاں مقام رکھتا ہے، جس پر پولیس محکمہ مبارکباد کا مستحق ہے، تاہم جہاں جرائم کی شرح زیادہ ہے وہاں مزید محنت کی ضرورت ہے۔

سدارامیا نے مشورہ دیا کہ سائبر جرائم سمیت دیگر جرائم کی روک تھام کے لیے جدید ٹیکنالوجی کا بھرپور استعمال کیا جائے تاکہ مؤثر نتائج حاصل کیے جا سکیں۔

انہوں نے کہا کہ پولیس اہلکار چوبیس گھنٹے اپنی ذمہ داریاں نبھا کر معاشرے میں امن و سکون اور ہم آہنگی کو برقرار رکھتے ہیں۔ خاص طور پر خواتین، بچوں اور کمزور طبقات کے تحفظ کو حکومت نے اولین ترجیح دی ہے، لہٰذا پولیس کو بھی اس سمت میں خصوصی توجہ دینی چاہیے۔

وزیر اعلیٰ نے کہا کہ حکومت کا ہدف کرناٹک کو منشیات سے پاک ریاست بنانا ہے اور اس مقصد کے حصول کے لیے پولیس محکمہ کو بھی مؤثر کردار ادا کرنا ہوگا۔

انہوں نے ایوارڈ حاصل کرنے والے پولیس اہلکاروں کو مبارکباد پیش کرتے ہوئے کہا کہ ان کی پیشہ ورانہ خدمات دوسروں کے لیے مثال بنیں۔

اس موقع پر وزیر داخلہ جی پرمیشور اور ریاستی پولیس کے ڈائریکٹر جنرل ڈاکٹر ایم اے سلیم سمیت دیگر اعلیٰ حکام بھی موجود تھے۔