بنگلورو ، 19/ مارچ (ایس او نیوز /ایجنسی)ریاستی وزیر برائے محصولات کرشنا بائرے گوڑا نے بتایا کہ کرناٹک میں ذات اور آمدنی کے سرٹیفکیٹس کی فراہمی کے عمل میں نمایاں بہتری آئی ہے۔
انہوں نے کہا کہ اب تک موصول ہونے والی تقریباً 1.6 کروڑ درخواستوں میں سے 98 لاکھ درخواستوں کو "سکالا" اسکیم کے تحت مقررہ وقت میں نمٹایا گیا ہے، جس کے نتیجے میں 99.35 فیصد درخواستوں پر بروقت خدمات فراہم کی گئی ہیں۔
قانون ساز کونسل میں کانگریس رکن عبدالجبار کے سوال کا جواب دیتے ہوئے وزیر موصوف نے مزید بتایا کہ حکومت کا مقصد عوام کو سرکاری خدمات کی فراہمی میں شفافیت، تیزی اور جوابدہی کو یقینی بنانا ہے۔ اس کے لیے مختلف محکموں میں ڈیجیٹل نظام کو مضبوط کیا گیا ہے، تاکہ شہریوں کو سرکاری دفاتر کے چکر نہ لگانے پڑیں۔
انہوں نے کہا کہ سکالا اسکیم کے مؤثر نفاذ کے باعث عوام کو بڑی راحت ملی ہے اور سرکاری خدمات کے حصول کا عمل پہلے کے مقابلے میں کافی آسان اور تیز ہو گیا ہے۔کرشنا بائرے گوڑا نے یقین دلایا کہ مستقبل میں بھی عوامی خدمات کو مزید بہتر بنانے اور ہر درخواست کو مقررہ وقت میں نمٹانے کے لیے حکومت سنجیدہ اقدامات جاری رکھے گی۔