جدہ یکم اگست (ایس او نیوز): سعودی عرب کے سیاحتی مقام طائف کے الحدیٰ علاقے میں بدھ کی شام ایک تفریحی جھولا گرنے سے کم از کم 23 افراد زخمی ہو گئے، جن میں کئی نوجوان لڑکیاں بھی شامل ہیں۔ زخمیوں میں سے تین کی حالت تشویشناک بتائی گئی ہے۔

واقعہ اس وقت پیش آیا جب جھولا مکمل طور پر سواروں سے بھرا ہوا چل رہا تھا۔ عینی شاہدین کے مطابق اچانک جھولے کی ساخت منہدم ہو گئی جس سے سوار نیچے آ گرے اور پارک میں افراتفری مچ گئی۔ جائے وقوع پر شہری دفاع اور سعودی ریڈ کریسنٹ کے امدادی اہلکار فوری طور پر پہنچے اور زخمیوں کو قریبی اسپتالوں میں منتقل کیا، جہاں شدید زخمی افراد کو انتہائی نگہداشت میں رکھا گیا ہے۔

واقعہ کی سنگینی کو دیکھتے ہوئے سعودی حکام نے پارک کو فوری طور پر بند کر دیا ہے۔ سرکاری بیان کے مطابق میونسپل حکام، جنرل انٹرٹینمنٹ اتھارٹی اور سیکیورٹی ادارے مشترکہ طور پر واقعے کی مکمل تحقیقات کر رہے ہیں تاکہ حادثے کی اصل وجہ اور حفاظتی تقاضوں کی پاسداری کا جائزہ لیا جا سکے۔

حادثے کی ویڈیو سوشل میڈیا پر تیزی سے وائرل ہونے کے بعد ملک بھر میں عوامی تشویش میں اضافہ دیکھنے میں آیا۔ ویڈیو میں جھولے کے ٹوٹنے کا منظر اور سواروں کی دل دہلا دینے والی چیخیں سنی جا سکتی ہیں۔

بدھ کی شب تک حادثے کی جگہ کو مکمل طور پر گھیرے میں لے لیا گیا تھا اور ماہرین کی ٹیمیں تحقیقات میں مصروف تھیں۔