ٹمکور9 جنوری(ایس او نیوز):کرناٹک کے ضلع ٹمکور میں جمعہ کی علی الصبح ایک المناک سڑک حادثے میں چار افراد موقع پر ہی جاں بحق ہو گئے، جب ایک کروزر کار کورا نیشنل ہائی وے کے قریب وسنت نرساپور صنعتی علاقے میں سڑک کنارے پارک ایک لاری سے تیز رفتاری سے ٹکراگئی۔ حادثے کا شکار ہونے والے تمام افراد شبری مالہ یاترا مکمل کرکے واپس لوٹ رہے ایّپا سوامی کے عقیدت مند تھے۔

ذرائع کے مطابق یہ حادثہ صبح تقریباً 5 بجے پیش آیا، جب شاہراہ پر شدید دھند چھائی ہوئی تھی، جس کے باعث حدِ نظر کم ہو گئی۔ شبہ ظاہر کیا جا رہا ہے کہ دھند کے باعث ڈرائیور کو پارک کی ہوئی لاری نظر نہیں آئ ہوگی جس کے نتیجے میں کروزر کار سڑک کنارے کھڑی لاری سے ٹکرا گئی۔

کروزر کار میں کل 11 ایّپا مالادھاری سوار تھے، جو سب کے سب کوپل ضلع کے کوکنور قصبے کے رہائشی بتائے جا رہے ہیں۔ حادثے میں چار افراد، جن میں ایک سات سالہ بچی بھی شامل ہے، موقع پر ہی دم توڑ گئے، جبکہ سات دیگر افراد شدید زخمی ہو گئے، جنہیں فوری طور پر قریبی سرکاری اور نجی اسپتالوں میں منتقل کیا گیا۔
جاں بحق ہونے والوں کی شناخت ساکشی (7)، ماروتپا (45)، وینکٹیش (30) اور گوِسِدّپا (28) کے طور پر کی گئی ہے۔ زخمیوں میں پروین کمار (28)، راجپا (45)، سرینواس (32)، ہولی گپا (32)، تیرُپتی (33)، سرینواس (32) اور راکیش (24) شامل ہیں۔ اسپتال ذرائع کے مطابق بعض زخمیوں کی حالت تشویشناک ہے۔

اطلاع ملتے ہی کورا پولیس تھانہ کے اہلکار موقع پر پہنچے اور ریسکیو کارروائی انجام دی۔ حادثے کے باعث کچھ دیر کے لیے قومی شاہراہ پر ٹریفک متاثر رہی، جسے بعد ازاں تباہ شدہ گاڑیوں کو ہٹانے کے بعد بحال کر دیا گیا۔ جاں بحق افراد کی نعشوں کو پوسٹ مارٹم کے لیے اسپتال منتقل کیا گیا ہے۔

پولیس نے اس سلسلے میں مقدمہ درج کر لیا ہے اور حادثے کی وجوہات جاننے کے لیے مزید تحقیقات جاری ہیں۔ اس دردناک واقعے سے متاثرہ خاندانوں اور مقامی عوام میں گہرے رنج و غم کی لہر دوڑ گئی ہے، جبکہ ایک بار پھر طویل فاصلے کے مذہبی سفر کے دوران سڑک تحفظ پر سوالات کھڑے ہو گئے ہیں۔