شارجہ، متحدہ عرب امارات 8/ڈسمبر (ایس او نیوز/پریس ریلیز) — کرناٹک  کمیونٹی  کے اراکین نے ہفتہ 6 دسمبر 2025 کو شارجہ میں واقع تھمبے وِلّا میں ایک پُروقار تقریب میں شرکت کی، جہاں تُھمبے گروپ کے متحدہ عرب امارات میں 28 سالہ شاندار سفر کا جشن منایا گیا۔ یہ شام جشن، ثقافت اور اعترافِ خدمات کا حسین امتزاج ثابت ہوئی، جس میں مشترکہ کامیابیوں کو اجاگر کیا گیا اور اُن قائدین کو خراجِ تحسین پیش کیا گیا جنہوں نے کاروباری اور سماجی میدان میں نمایاں خدمات انجام دیں۔

پروگرام کا آغاز ایک ویڈیو پریزنٹیشن سے ہوا،  جس میں ڈاکٹر تھمبے معیدین کی قیادت میں تھمبے گروپ کے ارتقائی سفر کو نمایاں کیا گیا۔ استقبالیہ خطاب میں ڈاکٹر تھمبے معیدین نے تعلیم، صحت اور تحقیق کے شعبوں میں ادارے کی عالمی سطح پر پہچان بننے تک کے سفر پر روشنی ڈالی اور یو اے ای کی قیادت نیز کرناٹک ڈایاسپورا کا مسلسل تعاون پر شکریہ ادا کیا۔

اس موقع پر معزز مہمانوں نے بھی خطاب کیا، جن میں کرناٹک قانون ساز اسمبلی کے اسپیکر شری یو ٹی قادر شامل تھے، جنہوں نے خلیج میں بھارتی برادری کی کاروباری صلاحیتوں اور خدمات کو سراہا۔ اسی طرح متحدہ عرب امارات میں بھارت کے قونصل جنرل ستیش کمار سیون نے تھمبے گروپ کے اس کردار کی تعریف کی جس کے ذریعے دوطرفہ تعلقات کو فروغ ملا اور طبی تعلیم و صحت کی معیاری خدمات کے ذریعہ بھارت کی عالمی شناخت میں اضافہ ہوا۔

کمیونٹی کے سرکردہ رہنماؤں اور معروف شخصیات، جن میں ڈاکٹر کاوپ محمد،  پروین شیٹی،  محمد علی اوچِل،  ششی دھر ناگراجپّا اور ہدایت ادّّور شامل تھے، نے اپنے خیالات کا اظہار کیا اور اتحاد و اجتماعی ترقی کی اہمیت پر زور دیا۔

تقریب کی نمایاں جھلک لائف ٹائم اچیومنٹ ایوارڈز کی پیشکش تھی، جس کے ذریعے دو معتبر شخصیات کو اعزاز سے نوازا گیا: دبئی میں ای ایم سی او انٹرنیشنل اور الیکٹرک وے کے چیئرمین مسٹر محمد میران، اور بیریز کلچرل فورم کے صدر ڈاکٹر بی کے یوسف۔ دونوں اعزازی شخصیات کو اُن کی قیادت، دہائیوں پر محیط خدمات اور یو اے ای سمیت دیگر خطوں میں کمیونٹیز کی فلاح و ترقی میں کردار کے اعتراف میں سراہا گیا۔

پروگرام کا اختتام کلماتِ تشکر، گروپ فوٹوگرافی اور نیٹ ورکنگ ڈنر کے ساتھ ہوا، جس کے دوران شرکاء نے ایک دوسرے سے ملاقات کی اور مشترکہ شناخت، کامیابیوں اور کمیونٹی فخر کا جشن منایا۔