بنگلورو ، 2/ اپریل (ایس او نیوز /ایجنسی) آل انڈیا کانگریس کمیٹی کے جنرل سکریٹری رندیپ سنگھ سرجے والا اور کرناٹک پردیش کانگریس کمیٹی کے صدر و نائب وزیر اعلیٰ ڈی کے شیوکمار نے مرکز کی بی جے پی حکومت پر مہنگائی کے ذریعے عوام کو شدید مشکلات میں دھکیلنے کا الزام عائد کیا ہے۔

کے پی سی سی دفتر میں منعقدہ مشترکہ پریس کانفرنس سے خطاب کرتے ہوئے قائدین نے کہا کہ یکم اپریل سے مرکزی حکومت عوام پر مہنگائی کا نیا بوجھ ڈالنے جا رہی ہے، جس سے عام آدمی کی زندگی مزید دشوار ہو جائے گی۔ ان کے مطابق مہنگائی اب ایک ایسا ذریعہ بن چکی ہے جس کے ذریعے عوام کی محنت کی کمائی کو لوٹا جا رہا ہے۔

انہوں نے الزام لگایا کہ ٹول ٹیکس میں مسلسل اضافہ “ہائی وے ڈکیتی” کے مترادف ہے اور گزشتہ برسوں میں کرناٹک کے عوام سے ہزاروں کروڑ روپے وصول کیے گئے ہیں۔ یکم اپریل سے مزید اضافہ کرتے ہوئے عوام پر اضافی مالی بوجھ ڈالا جا رہا ہے۔

رندیپ سنگھ سرجے والا نے کہا کہ ضروری ادویات کی قیمتوں میں اضافہ مریضوں کے لیے بڑا دھچکا ہے۔ ان کے مطابق نو سو سے زائد ادویات مہنگی کی جا رہی ہیں، جن میں ذیابیطس، بلڈ پریشر اور دیگر بیماریوں کی دوائیں شامل ہیں۔ انہوں نے جی ایس ٹی میں اضافے کو بھی عوام مخالف قرار دیا۔

قائدین نے کہا کہ پلاسٹک مصنوعات، سیمنٹ، لوہا اور دیگر ضروری اشیاء کی قیمتوں میں اضافہ براہ راست عام آدمی اور تعمیراتی شعبے کو متاثر کرے گا۔ اس کے علاوہ ہوائی سفر، ایندھن، اور گھریلو گیس کی قیمتوں میں اضافہ بھی عوام کے لیے مشکلات میں مزید اضافہ کر رہا ہے۔

اس موقع پر ڈی کے شیوکمار نے بی جے پی حکومت کو تنقید کا نشانہ بناتے ہوئے کہا کہ “اچھے دن” کا وعدہ کرنے والی حکومت آج عوام کو مہنگائی کے بوجھ تلے دبا رہی ہے۔ انہوں نے طنزیہ انداز میں کہا کہ اجولا یوجنا کے بجائے عوام کو “لکڑی کے چولہے” کی طرف دھکیلا جا رہا ہے۔

انہوں نے مزید کہا کہ بجلی کے استعمال میں اضافہ، گیس سلنڈر کی قلت اور بلیک مارکیٹنگ نے عوام کی پریشانیوں میں اضافہ کر دیا ہے۔ ساتھ ہی انہوں نے مرکز سے مطالبہ کیا کہ وہ ریاستی حکومت کی طرح عوام کو راحت دینے کے لیے متبادل اسکیمیں متعارف کرائے۔

کانگریس قائدین نے خبردار کیا کہ اگر مہنگائی پر قابو نہ پایا گیا تو عام آدمی کی زندگی مزید متاثر ہوگی اور اس کے سنگین معاشی نتائج برآمد ہو سکتے ہیں۔