بنگلورو ، 11/فروری (ایس او نیوز/ایجنسی) کرناٹک ہائی کورٹ نے پیر کو ریاستی وقف بورڈ کے مسلم جوڑوں کو شادی اور طلاق کے سرٹیفکیٹ جاری کرنے کے اختیار پر سوالات اٹھائے ہیں اور یہ جانچنے کی کوشش کی ہے کہ کیا وقف ایکٹ کے تحت اس طرح کے اختیارات حاصل ہیں۔ چیف جسٹس این وی انجاریا اور جسٹس ایم آئی ارون کی ایک ڈویژن بنچ نے وقف بورڈ کو شادی کے سرٹیفکیٹ جاری کرنے کا اختیار دینے والے حکومتی حکم کو چیلنج کرنے والی ایک عرضی کی سماعت کے دوران کہا کہ ایسا لگتا ہے کہ بورڈ کے پاس اس طرح کے اختیارات کا کوئی قانونی جواز نہیں ہے۔

بنچ نے اس موقع پر کہا، ''کیا وقف بورڈ شادی اور طلاق کے سرٹیفکیٹ بھی جاری کر رہا ہے؟ ہم اس جواب کے لیے زیادہ وقت نہیں دیں گے کیونکہ یہ ایک بہت اہم مسئلہ ہے۔ ظاہر ہے کہ آپ کو وقف ایکٹ کے تحت اس طرح کے اختیارات حاصل نہیں ہیں۔''

ہائی کورٹ نے گزشتہ سال نومبر میں 30 اگست 2023 کو جاری کیے گئے حکومتی حکم پر روک لگادی تھی، جس کے تحت ریاست کے مختلف ضلع وقف بورڈوں کو مسلم جوڑوں کو شادی کے سرٹیفکیٹ جاری کرنے کی اجازت دی گئی تھی۔ اس حکم کو عالم پاشا کی جانب سے دائر کردہ پبلک انٹرسٹ لٹیشن (پی آئی ایل) کے ذریعے چیلنج کیا گیا تھا۔ درخواست گزار نے یہ موقف اختیار کیا کہ سابقہ قوانین کے تحت مسلم شادیاں کرنے والے قاضی نکاح نامہ جاری کرنے کے مجاز تھے، تاہم یہ قانون 2013 میں منسوخ کر دیا گیا تھا اور اس کے بعد ریاستی حکومت نے ایک سرکاری حکم جاری کیا جس میں وقف بورڈ کو اس طرح کے سرٹیفکیٹس جاری کرنے کی اجازت دی گئی۔

پی آئی ایل میں استدلال کیا گیا کہ وقف ایکٹ 1995 صرف وقف اداروں کے منقولہ اور غیر منقولہ جائیدادوں کے انتظام سے متعلق ہے اور اس میں بورڈ کو شادی یا طلاق کے سرٹیفکیٹ جاری کرنے کا اختیار دینے کا کوئی انتظام نہیں ہے۔

پچھلی سماعت میں نومبر 2024 میں حکومت نے یہ کہا تھا کہ مسلم جوڑوں کو شادی کے سرٹیفکیٹ حاصل کرنے میں بیرون ملک سفر کرنے میں مشکلات پیش آ رہی ہیں، جس کے پیش نظر حکومتی حکم کی ضرورت تھی۔ تاہم، ہائی کورٹ نے اس پر مزید بحث تک اس حکم پر روک لگا دی۔ بنچ کو پیر کو بتایا گیا کہ ریاست میں کوئی وکیل دستیاب نہیں تھا جس کے باعث اس معاملے کی سماعت ملتوی کرنا پڑی۔ اب یہ معاملہ 19 فروری کو دوبارہ سماعت کے لیے درج ہے۔