بھٹکل، 31 مارچ (ایس او نیوز): تقریباً 16 سال کے طویل وقفے کے بعد ملک بھر میں مردم شماری 2026 کا پہلا مرحلہ یکم اپریل سے شروع ہو رہا ہے، جس کے تحت "ہاؤس لسٹنگ اینڈ ہاؤسنگ سینسس" انجام دیا جائے گا۔ اس بار مردم شماری پہلی مرتبہ مکمل طور پر ڈیجیٹل انداز میں منعقد کی جا رہی ہے، جس میں شہریوں کو اپنی معلومات خود آن لائن درج کرنے کی سہولت بھی فراہم کی گئی ہے۔
حکام کے مطابق جدید ٹیکنالوجی کے استعمال کے ساتھ یہ مردم شماری دنیا کی سب سے بڑی ڈیجیٹل مردم شماری ہوگی، جس سے نہ صرف ڈیٹا کی پروسیسنگ تیز ہوگی بلکہ شفافیت میں بھی نمایاں اضافہ ہوگا۔
بھٹکل کے تحصیلدار ناگیندر کولشیٹی نے بتایا کہ یکم اپریل سے 15 اپریل 2026 تک عوام کے لیے سیلف اینیومریشن (Self-Enumeration) کی سہولت دستیاب رہے گی، جس کے ذریعے شہری آن لائن پلیٹ فارم پر اپنی معلومات خود درج کر سکتے ہیں۔ اس کے بعد 16 اپریل سے 15 مئی تک مردم شماری کا عمل فیلڈ ویریفکیشن مرحلے میں داخل ہوگا، جس کے دوران اہلکار گھر گھر جا کر درج کردہ معلومات کی تصدیق کریں گے۔
انہوں نے بتایا کہ اس مردم شماری کے دوران مکان کی نوعیت (پکا یا کچا)، پانی، بجلی اور بیت الخلاء جیسی بنیادی سہولیات، رہائشی حالات اور انفراسٹرکچر سے متعلق معلومات حاصل کی جائیں گی، جبکہ ہر گھر کے افراد کی مکمل تفصیلات جیسے عمر، تعلیم، پیشہ اور ذات (Caste) بھی درج کی جائیں گی۔
تحصیلدار کے مطابق بھٹکل تعلقہ میں مردم شماری کے عمل کو مؤثر طریقے سے انجام دینے کے لیے مضافاتی اور شہری علاقوں کے لیے الگ الگ انتظامات کیے گئے ہیں۔ مضافاتی علاقوں کی نگرانی تحصیلدار کے ذمہ ہے جبکہ شہری علاقوں کی ذمہ داری سٹی میونسپل کونسل کے کمشنر کو سونپی گئی ہے۔ دونوں کی نگرانی میں مجموعی طور پر 289 اینیومیریٹرز (فیلڈ ورکرس) تعینات کیے گئے ہیں، جن میں 190 مضافاتی علاقوں اور 99 شہری علاقوں میں خدمات انجام دیں گے۔
انہوں نے واضح کیا کہ تمام فیلڈ عملے کو باقاعدہ تربیت فراہم کی جا رہی ہے اور وہ 16 اپریل سے گھر گھر جا کر نہ صرف آن لائن فراہم کردہ معلومات کی تصدیق کریں گے بلکہ ان افراد کا ڈیٹا بھی جمع کریں گے جنہوں نے سیلف اینیومریشن کے ذریعے معلومات فراہم نہیں کی ہوں گی۔
سرکاری اعداد و شمار کے مطابق 2011 کی مردم شماری میں بھٹکل کے شہری علاقے میں 14,219 مکانات اور تقریباً 73,200 کی آبادی درج کی گئی تھی، جبکہ مضافاتی علاقوں میں قریب 30 ہزار مکانات کا اندراج ہوا تھا۔
ذرائع کے مطابق ملک بھر میں اس وسیع عمل کے لیے تقریباً 30 لاکھ اہلکاروں کو تعینات کیا گیا ہے۔ حکام نے یقین دہانی کرائی ہے کہ مردم شماری کے دوران حاصل کی جانے والی تمام معلومات مکمل طور پر خفیہ رکھی جائیں گی اور انہیں کسی بھی صورت میں عام نہیں کیا جائے گا۔
یہ بھی معلوم ہوا ہے کہ اس بار مردم شماری میں ذات (Caste) کی تفصیلات بھی بڑے پیمانے پر شامل کی جائیں گی، جو آزادی کے بعد ایک اہم پیش رفت سمجھی جا رہی ہے۔
ماہرین کے مطابق مردم شماری ملک میں پالیسی سازی، ترقیاتی منصوبہ بندی، وسائل کی منصفانہ تقسیم اور سیاسی حلقہ بندی (Delimitation) کے لیے بنیادی اہمیت رکھتی ہے۔
حکام نے عوام سے اپیل کی ہے کہ وہ سیلف اینیومریشن کے ذریعے اپنی معلومات بروقت درج کریں اور بعد ازاں تصدیق کے لیے آنے والے اہلکاروں کے ساتھ مکمل تعاون کریں، کیونکہ درست اور جامع معلومات ہی مؤثر منصوبہ بندی کی بنیاد بنتی ہیں۔
سیلف اینیومریشن کے لیے شہری سرکاری ویب پورٹل کے ذریعے اپنی معلومات درج کر سکتے ہیں: https://se.census.gov.in