نئی دہلی/ بنگلورو، 10 جون (ایس او نیوز / ایجنسی)  کرناٹک کے وزیر اعلیٰ سدارامیا نے پیر کو دہلی میں کانگریس کے سینئر لیڈر راہول گاندھی سے ملاقات کے بعد اعلان کیا کہ ریاست میں ذات پر مبنی مردم شماری کا عمل دوبارہ شروع کیا جائے گا۔ اس موقع پر ان کے ہمراہ نائب وزیر اعلیٰ ڈی کے شیو کمار بھی موجود تھے۔

سدارامیا نے میڈیا سے بات کرتے ہوئے کہا کہ "ہم نے راہول گاندھی جی کے ساتھ ریاست کی مجموعی ترقی، سماجی حالات اور ذات پر مبنی مردم شماری کے حوالے سے تفصیلی گفتگو کی۔ سابقہ سروے کی رپورٹ اب تقریباً دس سال پرانی ہو چکی ہے، لہٰذا موجودہ حالات کو مدنظر رکھتے ہوئے ایک نئے، تازہ اور جامع سروے کی شدید ضرورت ہے۔"

انہوں نے واضح کیا کہ اس نئی مردم شماری کا عمل آئندہ 90 دنوں کے اندر مکمل کر لیا جائے گا، تاکہ ریاست کی فلاحی اسکیموں کو زمینی حقائق کی بنیاد پر ترتیب دیا جا سکے۔ وزیر اعلیٰ کا کہنا تھا کہ "کچھ حلقوں نے سابقہ مردم شماری رپورٹ پر اعتراضات اور تحفظات ظاہر کیے تھے، جنہیں حکومت سنجیدگی سے لے رہی ہے۔ تاہم ہم سمجھتے ہیں کہ صرف درست اور مکمل اعداد و شمار ہی ایسی پالیسیوں کی بنیاد بن سکتے ہیں جو سماجی انصاف کو فروغ دے سکیں۔"

اس موقع پر وزیر اعلیٰ سدارامیا نے حال ہی میں بنگلورو کے چناسوامی اسٹیڈیم میں پیش آئے بھگدڑ کے سانحے پر بھی گہرے دکھ کا اظہار کرتے ہوئے کہا کہ یہ ایک انتہائی افسوسناک واقعہ تھا، جس میں 11 قیمتی جانیں ضائع ہوئیں۔

انہوں نے بتایا کہ ریاستی حکومت نے فوری طور پر مؤثر اقدامات کرتے ہوئے سی آئی ڈی انکوائری، جسٹس کنہا کمیشن کی قیادت میں جانچ، متعلقہ پولیس افسران کی معطلی اور انٹیلی جنس چیف کا تبادلہ جیسے فیصلے لیے ہیں۔ وزیر اعلیٰ نے کہا کہ جیسے ہی انکوائری رپورٹ سامنے آئے گی، حکومت اس کی روشنی میں مزید قانونی اور انتظامی کارروائی کرے گی۔