بنگلورو، 26 جون (ایس او نیوز / ایجنسی):کرناٹک حکومت نے ریاست میں عوامی صحت کے تحفظ کے لیے ایک اہم قدم اٹھاتے ہوئے 15 خطرناک دواؤں اور کاسمیٹک مصنوعات کے استعمال، فروخت اور تقسیم پر فوری طور پر پابندی عائد کر دی ہے۔ ان ممنوعہ اشیاء میں مشہور بخار کی دوا پومول-650 (پیرسیٹامول) اور اوم شانتی گولڈ کلاس کُمکُم جیسی روزمرہ کی استعمال کی اشیاء بھی شامل ہیں۔

ریاستی محکمہ فوڈ سیفٹی اینڈ ڈرگ ایڈمنسٹریشن نے ان مصنوعات کے مئی 2025 میں مختلف مقامات سے نمونے حاصل کیے تھے، جن کی لیبارٹری جانچ میں خطرناک خامیاں اور غیر محفوظ اجزاء پائے گئے۔ اس بنیاد پر محکمہ نے باضابطہ سرکولر جاری کر کے ان تمام اشیاء کو "غیر محفوظ اور صحت کے لیے مضر" قرار دیا ہے۔

سرکولر میں واضح ہدایت دی گئی ہے کہ یہ تمام مصنوعات نہ فروخت کی جائیں، نہ استعمال کی جائیں اور نہ ہی کسی بھی شکل میں تقسیم کی جائیں، جب تک مزید احکامات جاری نہ ہوں۔

ریاستی وزیر صحت دنیش گنڈو راؤ نے اس سلسلے میں ایک ایڈوائزری جاری کرتے ہوئے تمام دواساز کمپنیوں، دکانداروں اور صارفین سے اپیل کی ہے کہ وہ فوری طور پر ان اشیاء کا استعمال بند کریں تاکہ کسی بھی ممکنہ صحت کے خطرے سے بچا جا سکے۔

متاثرہ مصنوعات کی فہرست درج ذیل ہے:

• کمپاؤنڈ سوڈیم لیکٹیٹ انجیکشن – الٹرا لیبارٹریز پرائیویٹ لمیٹڈ

• کمپاؤنڈ سوڈیم لیکٹیٹ انجیکشن – ٹام براؤن فارماسیوٹیکلز

• پومول-650 (پیرسیٹامول) – ابان فارماسیوٹیکلز

• میتو کیو-7 شربت – بایون تھیراپیوٹکس

• ویٹرنری ویکسین کے لیے 200 ملی اسٹیرائل ویسل – سیف پیرینٹیریل

• اسپین پلوکس-او ڈی ٹیبلٹ – انڈوراما ہیلتھ کیئر

• پینٹوکوٹ-ڈی ایس آر – سویفن فارماسیوٹیکلز

• سوڈیم کلورائیڈ انجیکشن 0.9 فیصد – پونسکا انجیکٹیبلز (دو مرتبہ درج)

• الفا لیپوئک ایسڈ و دیگر وٹامنز – ایسٹ افریکن انڈیا

• اوم شانتی گولڈ کلاس کُمکُم – این رنگا راؤ اینڈ سنز

• پائیراسیڈ-او سسپنشن – ریڈنیکس فارما

• گلیمیز-2 (گلیمپی رائیڈ) – کے این ایم فارما

• آئرن سوکروز انجیکشن (ایروجن) – ریگن لیبارٹریز

• کمپاؤنڈ سوڈیم لیکٹیٹ انجیکشن (رِنگر لیکٹیٹ) – اوتسُکا فارماسیوٹیکلز انڈیا

ریاستی حکومت نے کہا ہے کہ مستقبل میں بھی جعلی یا غیر معیاری ادویات تیار کرنے والی کمپنیوں کے خلاف سخت کارروائی جاری رہے گی، تاکہ عوام کی صحت کے ساتھ کسی بھی قسم کا سمجھوتہ نہ ہو۔