بینگلور 30/اکتوبر (ایس او نیوز) وزیر اعلیٰ سدارامیا نے کہا کہ ضلع جنوبی کَنّڑا اب مکمل طور پر انتظامیہ کے قابو میں ہے اور اس کامیابی کا سارا کریڈٹ پولیس افسران اور عملے کو جاتا ہے۔ انہوں نے بتایا کہ دو افسران کی تبدیلی کے بعد حالات قابو میں آگئے ہیں۔یہ بات وزیر اعلیٰ نے قانون ساز عمارت ودھان سودھا میں پولیس محکمہ کے زیر اہتمام منعقدہ پروگرام کے دوران کہی، جس میں پولیس اہلکاروں کو نئی وردی فراہم کی گئی، انسداد منشیات ٹاسک فورس کا افتتاح کیا گیا، اور "سنمتر" منصوبے کا کتابچہ بھی جاری کیا گیا۔

جنوبی کَنّڑا میں نظم و ضبط کی بحالی: سدارامیا نے کہا کہ ضلع میں پہلے فرقہ وارانہ کشیدگی اور غیر اخلاقی پولیس رویے بڑھ رہے تھے، لیکن افسران کی تبدیلی کے بعد حالات بہتر ہوئے ہیں۔ انہوں نے کہا کہ جو افسران اور عملہ یہ کامیابی لائے ہیں وہ ہمارے ہی ہیں، کسی اور دنیا سے نہیں آئے۔ اگر آپ دل سے کوشش کریں تو ہر کام ممکن ہے۔ یہ نظم و ضبط ہماری ہی ٹیم نے قائم کیا ہے۔

منشیات سے پاک کرناٹک ہمارا مقصد: وزیر اعلیٰ نے واضح کیا کہ "ڈرگ فری کرناٹک" ان کا ذاتی ہدف ہے، اور وہ چاہتے ہیں کہ پولیس بھی اسے اپنا مشن بنائے۔ انہوں نے کہا کہ نوجوان نسل منشیات کا شکار نہ ہو، اس کے لیے پولیس کو مؤثر اور سخت اقدامات کرنے ہوں گے۔ اگر محکمہ پولیس اس مقصد میں کامیاب ہو جاتا ہے تو کرناٹک پولیس کی ساکھ بین الاقوامی سطح پر بلند ہوگی۔سدارامیا نے مزید کہا کہ کچھ پولیس اہلکار ریئل اسٹیٹ اور منشیات مافیا سے جُڑے ہوئے ہیں، لیکن ضروری ہے کہ پولیس ان جرائم پیشہ عناصر کے خلاف سخت کارروائی کرے۔ انہوں نے کہا کہ آج مجرموں کو پولیس سے خوف کم ہو گیا ہے، اور پوچھا کہ ایسا کیوں ہوا؟ آپ کے ضمیر کو اس کا جواب دینا چاہیے۔وزیر اعلیٰ نے آخر میں پولیس کو ہدایت دی کہ جو لوگ ڈرگ بیچتے ہیں یا اس کی خرید و فروخت میں شامل ہیں، ان سب کو بے نقاب کریں۔ انہوں نے کہا کہ جلد از جلد ریاست کو "ڈرگ فری کرناٹک" بنا کر دکھائیں۔