بنگلورو 22/جنوری (ایس او نیوز): کرناٹک اسمبلی میں گورنر تھاورچند گہلوت کے خطاب کو محض دو جملوں تک محدود کیے جانے کے معاملے پر بھارتیہ جنتا پارٹی اور کانگریس کے درمیان لفظی جنگ تیز ہو گئی ہے۔ اسی تناظر میں کانگریس کے سینئر ایم ایل سی بی کے ہری پرساد نے اپنے فیس بک پیج پر بی جے پی کو سخت تنقید کا نشانہ بناتے ہوئے ایوان میں پیش آنے والے ماضی کے مبینہ نامناسب واقعات کو یاد دلایا۔

بی کے ہری پرساد نے کہا کہ بی جے پی کو اسمبلی کے وقار، نظم و ضبط اور عزت پر بات کرنے کا کوئی اخلاقی حق حاصل نہیں ہے۔ انہوں نے سوال اٹھایا کہ کون سی پارٹی کے اراکین نے ایوان کے اندر کپڑے پھاڑے، ہاتھوں میں ہاتھ ڈال کر غنڈہ گردی کا مظاہرہ کیا؟ انہوں نے مزید کہا کہ ریاست کے سنگین مسائل پر بحث کے بجائے ایوان میں فحش فلمیں دیکھ کر پورے ملک کے سامنے ریاست کو شرمندہ کرنے والے افراد کس پارٹی سے تعلق رکھتے تھے؟ اسی طرح اسپیکر کے چہرے پر دستاویزات پھینکنے کے واقعات کا بھی حوالہ دیتے ہوئے انہوں نے بی جے پی کو کٹہرے میں کھڑا کیا۔

ہری پرساد نے طنزیہ انداز میں کہا کہ کیا بی جے پی یہ دعویٰ کر سکتی ہے کہ ایسے نظم و ضبط، تہذیب اور وقار کے حامل افراد اس کے رکن ہیں؟ انہوں نے الزام عائد کیا کہ ریاست اس وقت اپنی سیاسی تاریخ کے ایک تاریک دور سے گزر رہی ہے، جہاں بی جے پی گورنر کے آئینی اختیارات کا غلط استعمال کر رہی ہے۔

انہوں نے مزید کہا کہ گورنر کو جو اختیارات حاصل ہیں وہ ٹیکس دہندگان کے پیسے سے ہیں، نہ کہ ناگپور کی کسی غیر رجسٹرڈ تنظیم سے ملنے والی رقم سے۔ کانگریس اپنے حقوق کے دفاع کے لیے ہر سطح پر کھڑی رہے گی، خواہ معاملہ گورنر کا ہو یا کسی اور آئینی عہدے پر فائز شخص کا، اگر وہ آئین کے خلاف کام کرے۔

آخر میں بی کے ہری پرساد نے کہا کہ کانگریس اتنی اخلاقی طور پر کمزور نہیں کہ اسے بی جے پی سے اخلاقیات سیکھنے کی ضرورت پڑے، اور کانگریس کو کبھی ایسے دن کا سامنا نہیں کرنا پڑے گا۔