بیلگاوی، 8/ دسمبر (ایس او نیوز /ایجنسی)کرناٹک ایگزامینشن اتھارٹی (کے ای اے) مختلف سرکاری محکموں میں تقررات کے لیے منعقد کیے جانے والے مسابقتی امتحانات میں غریب اور دیہی پس منظر کے امیدواروں پر کسی اضافی مالی بوجھ سے بچانے کے لیے فیس کی رقم نہ بڑھانے کے اصول پر کاربند ہے۔ یہ بات آج کونسل کے اجلاس میں اعلیٰ تعلیم کے وزیر ڈاکٹر ایم۔ سی۔ سدھاکر نے کہی۔

رکنِ کونسل نیرانی ہنومنتپا ردرپا کے سوال کا جواب دیتے ہوئے وزیر نے کہا کہ کے ای اے کو مسابقتی امتحانات کرانے کے لیے حکومت کی طرف سے کوئی مالی امداد نہیں دی جاتی۔ امتحانی مراکز کے اخراجات، سیکیورٹی و کنفیڈینشیلٹی کے انتظامات، پرنٹنگ، نقل و حمل، امتحانی پیکٹس کو مراکز تک پہنچانا اور واپس لانا، اور امتحانی عملے کو اعزازیہ دینا — یہ تمام اخراجات ادارہ خود برداشت کرتا ہے۔

”انہوں نے بتایا کہ 2024 میں اتھارٹی نے محض چند اشتہارات جاری کیے اور محدود فیس وصول کی، جبکہ مقابلہ جاتی امتحانات کے انتظامات میں جدید ٹیکنالوجی کا استعمال ناگزیر ہوگیا ہے، جس سے اخراجات میں اضافہ ہوا ہے۔ اس کے باوجود غریب اور دیہی امیدواروں کے مفاد میں فیس میں کوئی اضافہ نہیں کیا گیا۔وزیر‌ موصوف نے وضاحت کی کہ:“2022 سے اب تک کے ای اے نے وہی فیس برقرار رکھی ہے۔ اگر کوئی امیدوار مختلف محکموں کی ایسی آسامیوں کے لیے درخواست دیتا ہے جن کا سلیبس ایک ہو، تو پہلی آسامی کے لیے مکمل فیس اور ہر اضافی آسامی کے لیے صرف 100 روپے اضافی لیے جاتے ہیں، تاکہ امیدواروں پر بوجھ نہ بڑھے۔

مرکزی یا ریاستی پبلک سروس کمیشن کی طرز پر کم فیس مقرر کرنے کے مطالبے پر وزیر نے کہا کہ چونکہ کے ای اے کو حکومت کی طرف سے کوئی گرانٹ نہیں ملتی، اس لیے یہ پی ایس سی یا کے پی ایس سی کے ماڈل پر فیس مقرر کرنا ممکن نہیں ہے۔

ڈاکٹر سدھاکر نے واضح کیا کہ مسابقتی امتحانات کرانے میں اتھارٹی کو کوئی مالی منفعت حاصل نہیں ہوتی۔ ادارہ اپنے محدود وسائل میں شفاف، محفوظ اور بوجھ-سے-پاک امتحانی نظام فراہم کرنے کی کوشش کر رہا ہے۔